Page 10 - Pagsisiyam sa Karangalan ni Poong San Jose

at Gumawa.” Ating dalawin si San Jose doon sa pagawaan sa
Nasaret at doon ay makisama tayong gumawa sa piling ng Diyos.

Si San Jose ay nagbuhat sa dugo ng mga Hari; ngunit ang
kadakilaan ng kanyang lahi ay hindi pagiging hadlang upang
kanyang matutuhan ang gawain ng isang anluwagi. Ang kanyang
gawain tila walang halaga sa mata ng madla, datapwa’t si San
Jose ay hindi man dumaing dahil diyan. Siya ay namumuhay na
maligaya sa katayuang ipinagkaloob sa kanya ng Diyos at buong
kasiya-siya at matapat na tumupad sa mga tungkulin ng kanyang
katayuan, sa kanyang kaluluwa ay naghahari ang ganap na
kapayapaan. Si San Jose ay gumagawa sang-ayon sa Diyos. Ang
pawis na tumutulo sa kanyang noo ay natatalaga sa Anak ng
Diyos at sa Kanyang kabanal-banalang ina, nang upang sila ay
magkaroon ng ikakatawid sa buhay. Si San Jose samantalang
gumagawa, ang ala-ala at gunita ay hindi naman nalalayo sa
pinakamalinis sa mga babae at sa Sanggol na kaibig-ibig at
masintahing walang katulad sa balat ng lupa; ang dalawang
Talang ito ng puso at pag-ibig ay siyang paraiso niya dito sa lupa.
Samantalang gumagawa ay tila baga nauulinigan niya ang tinig
ng isang anghel na sa kanya ay sinabi ang pangungusap na ito
ng Banal na Kasulatan: “Hayan ang ating aliping tapat at
maalam, na pinagkatiwalaan ng Diyos na mamahala sa kanyang
angkan upang ipamahagi niya ang pagkain sa kapanahunan.”

Ang karamihan sa tao ay namumuhay sa mga hamak at abang
katayuan, sa pagbabanat ng kanilang mga bisig upang matamo
ang ipagtatawid-buhay. Tayo nga ay ay sumang-ayon sa ating
abang kapalarang itinalaga sa atin ng Diyos at iyan ay pinarangal
at pinaging dakila ni San Jose sa pamamagitan ng kanyang
halimbawa. Huwag nating kainggitan ang mga mayayaman. Sa
harap ng Diyos, ang tanging mahalaga ay tayo ay maging
masunurin sa mga tungkulin ng ating katayuan.

8